आपण अनेकदा आयुष्यात काहीतरी वेगळं करण्याचा विचार करतो. एखादा नवीन व्यवसाय सुरू करायचा असतो, नोकरी बदलायची असते, स्वतःमधील एखादी कला जगासमोर आणायची असते किंवा एखाद्या चुकीच्या नात्यातून बाहेर पडायचं असतं. पण मनात एक भीती निर्माण होते. लोक काय म्हणतील? अपयश आलं तर? आपल्याला जमलं नाही तर? आणि या सगळ्या प्रश्नांमध्ये आपण आपल्याच इच्छांना बाजूला ठेवतो.
हळूहळू आयुष्य जगण्यापेक्षा ते काढण्याची सवय लागते. पण एक गोष्ट लक्षात ठेवा, भीतीमुळे घेतलेले निर्णय अनेकदा आपल्याला सुरक्षित ठेवतात, पण आपल्या क्षमतांची ओळख होण्यापासूनही रोखतात.
१. प्रत्येक गोष्टीचा जास्त विचार करू नका.
एखादी गोष्ट करण्यापूर्वी तिच्या चांगल्या-वाईट परिणामांचा विचार करणं योग्य आहे. पण सतत विचार करत राहिल्यामुळे निर्णय घेण्याची क्षमता कमी होते. मानसशास्त्रात याला Overthinking म्हणतात. प्रत्येक गोष्ट परिपूर्ण होण्याची वाट पाहू नका. योग्य तयारी करून सुरुवात करा.
२. लोक काय म्हणतील याचा विचार सोडून द्या.
आपल्या आयुष्यातील अनेक निर्णय आपण दुसऱ्यांच्या मतांनुसार घेत असतो. लोक आपल्याला नावं ठेवतील, टीका करतील किंवा आपल्यावर हसतील, अशी भीती वाटते. पण लक्षात ठेवा, तुमच्या आयुष्याचे परिणाम तुम्हाला भोगायचे आहेत, लोकांना नाही. त्यामुळे प्रत्येक निर्णय घेताना स्वतःच्या गरजा आणि आनंदालाही महत्त्व द्या.
३. अपयशाला घाबरणं बंद करा.
अपयश म्हणजे आपली क्षमता संपली असं नाही. उलट अपयशातून आपल्याला स्वतःच्या चुका समजतात. एखादा प्रयत्न यशस्वी झाला नाही म्हणून पुन्हा प्रयत्न करू नये असं नाही. स्वतःला एक संधी द्या. कारण प्रयत्न न केल्याची खंत अनेकदा अपयशापेक्षाही जास्त त्रास देते.
४. स्वतःच्या क्षमतेवर विश्वास ठेवा.
आपण अनेकदा स्वतःला कमी समजतो. आपल्याला हे जमणार नाही, आपण यासाठी योग्य नाही, अशी नकारात्मक वाक्यं मनात तयार करतो. पण स्वतःबद्दलची ही धारणा बदलण्याची गरज आहे. स्वतःला सांगा, मी शिकू शकतो, मी प्रयत्न करू शकतो आणि परिस्थितीनुसार स्वतःमध्ये बदल घडवू शकतो.
५. स्वतःच्या आनंदासाठी निर्णय घ्या.
सगळ्यांना आनंदी ठेवण्याच्या प्रयत्नात स्वतःच्या इच्छा मारू नका. प्रत्येक वेळी दुसऱ्यांच्या अपेक्षा पूर्ण करणं ही तुमची जबाबदारी नाही. स्वतःसाठी वेळ काढा, आवडत्या गोष्टी करा आणि गरज पडल्यास नकार द्यायलाही शिका.
६. बदल स्वीकारण्याची तयारी ठेवा.
बदल झाला की सुरुवातीला अस्वस्थ वाटतं. कारण आपलं मन परिचित परिस्थितीत सुरक्षित असल्याचा अनुभव घेत असतं. पण नवीन अनुभव स्वीकारल्याशिवाय आपली प्रगती होऊ शकत नाही. त्यामुळे छोट्या छोट्या गोष्टींमध्ये बदल करण्याची सवय लावा.
७. एकदा स्वतःसाठी धाडसी निर्णय घ्या.
आयुष्यात कधीतरी स्वतःला सिद्ध करण्यासाठी एक पाऊल पुढे टाका. एखादं स्वप्न पूर्ण करण्यासाठी सुरुवात करा. स्वतःच्या आवडीच्या क्षेत्रात प्रयत्न करा. चुकीच्या सवयी सोडा. गरज असेल तिथे ठाम भूमिका घ्या. मात्र धाडस म्हणजे विचार न करता जोखीम घेणं नाही. परिस्थिती समजून, योग्य नियोजन करून घेतलेला निर्णय हेच खरे धाडस आहे.
आयुष्य खूप छोटं आहे. ते सतत भीती, चिंता, संकोच आणि दुसऱ्यांच्या अपेक्षांमध्ये घालवू नका. प्रत्येक वेळी सुरक्षित पर्याय निवडण्यापेक्षा कधीतरी स्वतःच्या स्वप्नांसाठी प्रयत्न करा.
कदाचित पहिल्या प्रयत्नात यश मिळणार नाही, कदाचित काही लोक तुमच्यावर टीकाही करतील. पण तुम्ही स्वतःसाठी उभे राहिलात, स्वतःला एक संधी दिलीत, हीच मोठी गोष्ट असेल.
कारण आयुष्य बदलण्यासाठी नेहमी मोठ्या संधीची गरज नसते, कधीकधी फक्त एक धाडसी निर्णय पुरेसा असतो.
म्हणून आयुष्य घाबरत घाबरत जगू नका. स्वतःवर विश्वास ठेवा आणि एकदा स्वतःसाठी डेअरिंग करा!
धन्यवाद.